Gjykata Speciale mund të shtyjë sërish vendimin ndaj ish-krerëve të Ushtrisë Çlirimtare të Kosovës, edhe pas afatit të zgjatur prej 60 ditësh për shpalljen e vendimit të gjykimit.
Zëdhënësja e Gjykatës Speciale në Hagë, Angela Griep, ka deklaruar për Albanian Post se kjo datë nuk është data për shpalljen e vendimit përfundimtar.
“Paneli i Gjykimit ka marrë një vendim për zgjatjen e afatit për shpalljen e Vendimit të Gjykimit për edhe 60 ditë, deri të hënën, më 20 korrik 2026, për shkak të kompleksitetit të çështjes. Kjo datë nuk është data për shpalljen e vendimit, por vetëm afati i zgjatur kohor”, deklaroi Griep për AP.
Ajo sqaroi se, nëse paneli vlerëson se një zgjatje e mëtejshme bëhet absolutisht e nevojshme, do të lëshojë një urdhër në këtë drejtim në kohën e duhur.
Hashim Thaçi, Kadri Veseli, Rexhep Selimi dhe Jakup Krasniqi u dërguan në Hagë në vitin 2020. Që prej atëherë, procesi ka përfshirë një periudhë të gjatë dëgjimesh, marrje në pyetje të dëshmitarëve dhe paraqitje të provave nga prokuroria dhe mbrojtja.
Gjatë gjithë kësaj kohe, rasti ka mbetur në qendër të vëmendjes publike, duke nxitur reagime të shumta brenda Kosovës dhe jashtë saj. Në këtë kontekst, zhvillimet e fundit në proces janë shoqëruar edhe me mobilizim qytetar dhe qëndrime publike që kanë reflektuar ndjeshmërinë e lartë të çështjes.
Kjo klimë u pa edhe në marshin gjithëkombëtar më 17 shkurt në Prishtinë, ku rreth 130 mijë qytetarë dolën për të kërkuar lirimin e ish-krerëve të Ushtrisë Çlirimtare të Kosovës. Një ditë më pas në deklarimet përfundimtare, ish-krerët e UÇK-së u shprehën se ndihen plotësisht të pafajshëm, duke i cilësuar akuzat e Zyrës së Prokurorit të Specializuar si “të pabazuara” dhe “të padrejta”.
Ata ripotencuan se lufta e Ushtrisë Çlirimtare të Kosovës ka qenë e drejtë dhe çlirimtare, dhe se veprimet e tyre kanë qenë të lidhura ngushtë me synimin për lirinë dhe pavarësinë e Kosovës.
Në këtë mënyrë, kërkesa masive e qytetarëve në Prishtinë dhe qëndrimet e ish-krerëve të UÇK-së në Hagë u ndërlidhën në perceptimin publik si dy zëra që, në distanca të ndryshme, artikuluan të njëjtën thirrje për drejtësi dhe përfundim të procesit gjyqësor.
